त्यानें त्यांच्यासाठीं नगर तयार केलें आहे. (इब्री 11:16)
तिथें कोणतेहि प्रदूषण नाहीं, किंवा भित्तिचित्र नाहीं, वा कचरा नाहीं, रंगाचे पापुद्रे काढणें नाहीं किंवा निकामी वस्तूंची खोली नाहीं, वाळलेलें गवत किंवा तुटलेल्या बाटल्या नाहींत, चवाठ्यांवर तापलेल्या चर्चा नाहींत, सर्वांसमक्ष तोंडावर फटकारणें नाहीं, घरगुती भांडणे किंवा हिंसा नाहीं, रात्र-प्रहरी धोके नाहीं, जाळपोळ नाहीं किंवा खोटे बोलणे किंवा चोरी करणे किंवा जीवें मारणे नाहीं, वा तोडफोड नाहीं आणि कुरूपता तर नाहींच.
देवाचे हें नगर परिपूर्ण असें असेल, कारण देव स्वतः तिथें आपली वस्ती करील. तो त्यां नगरांत वावरील, संभाषण करील आणि त्याचा प्रत्येक कानाकोपरा स्वतःच्या उपस्थितीने भरून टाकील. जे काही चांगले व मनोरम व पवित्र व अनुकूल व सत्य व हर्षाने भरलेले आहे ते सर्व तिथें असेल, कारण देव स्वतः तिथें आपली वस्ती करील.
तिथें परिपूर्ण न्याय केला जाईल आणि ज्यांनी या जगात ख्रिस्ताची आज्ञापालन करून जें जें दु:ख भोगले त्यां प्रत्येक दु:खाचे हजारपट प्रतिफळ दिलें जाईल. आणि ते कधीहि क्षय पावणार नाहीं. किंबहुना, अनंतकाळ जसजसा वाढत जाणाऱ्या आनंदासह सार्वकालिकतेंत विस्तारत जातो, तसतसा त्या प्रतिफळाचा उजळपणा अधिकच तेजस्वी होईल.
जेव्हां तुम्हीं ह्या नगराची पृथ्वीवरील इतर सर्व गोष्टींपेक्षा अधिक उत्कंठा धरतां, तेव्हां तुम्हीं देवाचा आदर करता, जो इब्री 11:10 नुसार, त्यां नगराचा योजक व उभारणारा आहे. आणि देवाचा आदर केला जातो तेव्हां तो प्रसन्न होतो व आपणाला तुमचा देव म्हणवून घ्यायला त्याला तुमची लाज वाटत नाहीं.