कारण ज्या मानाने घर बांधणाऱ्याला सबंध घरापेक्षा अधिक सन्मान आहे त्या मानाने हा मोशेपेक्षा अधिक वैभवास योग्य गणलेला आहे. कारण प्रत्येक घर कोणीतरी बांधलेले असते; पण सर्वकांहीं बांधणारा देवच आहे. जे पुढे विदित होणार होते याविषयीच्या साक्षीसाठीं ‘त्याच्या सबंध घरात मोशे सेवक ह्या नात्यानें विश्वासू होता.’ ख्रिस्त तर ‘देवाच्या घरावर’ नेमलेला पुत्र ह्या नात्यानें विश्वासू होता, आणि आपण आपला भरवसा व आपल्या आशेचा अभिमान शेवटपर्यंत दृढ राखल्यास त्याचे ते घर आहोत. (इब्री 3:3-6)
जे लोक येशू ख्रिस्ताठायीं अभिमान बाळगतात आणि त्याची आशा धरतात ते परमेश्वराचे घर आहेत. याचा अर्थ असा की येशू हा केवळ मोशेच्या काळांत किंवा जेव्हां तो ह्या पृथ्वीवर प्रकट झाला केवळ त्यां दिवसातच नव्हे – तर अगदी आज, म्हणजें संप्रतकाळीही आपला उत्पन्नकर्ता, आपला स्वामी, आपला शासक आणि आपल्याला सर्वकांहीं पुरविणारा आपला प्रदाता (पोशिंदा) आहे.
येशूला या घराचा “बांधणारा” म्हटलेले आहे. मोशे हा ‘बांधणारा’ नव्हता. तो घराचा सदस्य होता. म्हणून असें म्हटलेले आहे की, “येशू मोशेपेक्षा अधिक वैभवास योग्य गणलेला आहे – ज्या मानाने घर बांधणाऱ्याला सबंध घरापेक्षा अधिक सन्मान आहे त्या मानाने.” म्हणून मोशे, घराचे नेतृत्व करण्याच्या बाबतींत, आणि घरास परमेश्वराचे वचन देण्याच्या बाबतींत महान असला, तरीही तो घराचा केवळ एक सदस्य होता. पण घर येशूनें बांधले.
म्हणून जर आपण येशूठायीं अभिमान बाळगतो आणि येशूठायीं आशा धरतो तर आपण घर आहोत, आणि येशू हा आपला घर बनविणारा आणि स्वामी आणि शासक आणि पोशिंदा आहे. तो त्याच्या घराचा नाश होऊ देत नाहीं किंवा ते उध्वस्तही होऊ देत नाहीं.
मग लेखक आपले कल्पनाचित्र बांधणारा आणि घर या पासून, पुत्र आणि सेवक याकडे वळवतो. ”त्याच्या सबंध घरात मोशे सेवक ह्या नात्यानें विश्वासू होता.’ ख्रिस्त तर ‘देवाच्या घरावर’ नेमलेला पुत्र ह्या नात्यानें विश्वासू होता.” म्हणून ख्रिस्त त्यानें बनविलेल्या घराचा भाग बनला – घराण्याचा भाग बनला. पण तरीही, त्याचा आदर मोशेपेक्षा कितीतरी अधिक वरचा आहे. मोशे सेवक होता. ख्रिस्त पुत्र आहे. वारस आहे.
आणि आपण या घराचे सदस्य आहोत. इब्री 3:6: “आपण आपला भरवसा व आपल्या आशेचा अभिमान शेवटपर्यंत दृढ राखल्यास त्याचे ते घर आहोत.” सर्वप्रकारे, आपण मोशेचा आदर करावा या आणि जे त्याचे आहे ते आपण त्यास द्यावे. परंतु इब्रीकरांस लिहिलेल्या संपूर्ण पुस्तकांचा मुद्दा हा आहे : ख्रिस्त हा अधिक श्रेष्ठ आहे. प्रत्येक बाबतीत श्रेष्ठ. तो परमेश्वराच्या लोकांच्या घराचा बांधणारा आहे. परमेश्वराच्या लोकांच्या घरात तो पुत्र आहे. आपण मोशेचा आदर करू या. पण आपण येशूची उपासना करू या – जो आमचा कर्ता, आमचा बंधू आहे.